Tekst 2A

• Grieks
• Middelbare school
• vwo
• Leerjaar 2

Φίλιππος καὶ Ἀγαρίστη ἐξ Ἀθηνῶν ἐπὶ Λεβάδειαν ἔβαινον·

ἡ ὁδὸς μακρὰ ἦν καὶ πολλαῖς πέτραις χαλεπή.

τί δ’ ὅμως ἐπὶ Λεβάδειαν βαίνειν ἤθελον;

ἐν τῇ Λεβαδείᾳ
ἤθελον ἐπὶ τὸ μαντεῖον τοῦ Τροφωνίου βαίνειν.

ὁ δὲ Τροφώνιος ἦν υἱὸς τοῦ θείου ἰατροῦ Ἀσκληπιοῦ.

οἱ δὲ ἄνθρωποι τὸν Ἀσκληπιὸν καὶ τὸν Τροφώνιον μετὰ τὸν
θάνατον αὐτῶν ὡς θεοὺς ἔσεβον.

ὁ μὲν γὰρ Ἀσκληπιὸς ἐν Ἐπιδαύρῳ τὰς νόσους τῶν ἀνθρώπων ἔπαυεν καὶ τοῖς ἀνθρώποις τὰς τύχας προέλεγεν, ὁ δὲ Τροφώνιος ἐν Λεβαδείᾳ.

ὁ οὖν Φίλιππος καὶ ἡ Ἀγαρίστη περὶ τῶν τέκνων τὴν γνώμην τὴν τοῦ Τροφωνίου ἤθελον γιγνώσκειν.

ὁ γὰρ Φίλιππος καὶ ἡ Ἀγαρίστη δύο τέκνα εἶχον, νεανίσκον καὶ κόρην·

ὁ μὲν νεανίσκος καλός τε καὶ ἀγαθὸς ἦν, ἡ δὲ κόρη τυφλή.

ὁ δὴ νεανίσκος καὶ ἡ κόρη τῷ Φιλίππῳ καὶ τῇ Ἀγαρίστῃ μάλα φίλοι ἦσαν, ἀλλὰ ἡ κόρη πολλὴν λύπην παρεῖχεν αὐτοῖς.

ὁ οὖν Φίλιππος καὶ ἡ Ἀγαρίστη διὰ τὸν ἥλιον ἔκαμνον.

ἡ δ’ Ἀγαρίστη τῷ Φιλίππῳ ἔλεξεν·

ὦ Φίλιππε, μεσημβρία ἤδη ἐστίν.

ἐγὼ δὲ ταῖς βολαῖς τοῦ ἡλίου πάσχω.

ἆρα δυνατόν ἐστιν ἐν τῇ σκιᾷ δένδρων ἡσυχάζειν;

ὁ μέντοι Φίλιππος τῇ Ἀγαρίστῃ ἔλεξεν·

οὐκ ἔξεστιν ἡσυχάζειν.

προβαίνειν γὰρ δεῖ, εἰ ἐν καιρῷ μέλλομεν παρεῖναι ἐν Λεβαδείᾳ.

εἰ δὲ μή, αἱ πύλαι ἤδη κλῃσταί εἰσιν καὶ ἐκτὸς τῶν πυλῶν καθεύδειν δεῖ.

ἡμεῖς δ’ ἔτι πολὺ τῆς Λεβαδείας ἀπέχομεν. σπεύδειν οὖν δεῖ.

οὕτως ὁ Φίλιππος τὴν Ἀγαρίστην ἔπεισεν καὶ μετὰ ταῦτα σιγῇ
προέβαινον.